مجرد عضم
يعني حاسك هالايام مو ع بعضك , و ليك أنت بشو حاسس , و إذا حسيت بهل الشي ف الله يستر , و أنا صراحة و صلت بالإحساس لدرجة اسمها فرط حساسية مزمن , يعني كل واحد بيقلي حاسك انك مو أنت  فيك شي متغير , طيب أنا شو بعمل ؟
بروح لعند الدكتور بيسألني : شو حاسس هلق, طبعا صعب اشرحوا بشو حاسس و خصوصا انو ادخلت أنا و تعبان و ادفعت المبلغ الفلاني , فتغير إحساسي كليا ولا في تشابه بين الاحساسين قبل و بعد كأنو مو أنا , والدكتور أحسن من غيرو يعني لما بتوقف قدام أحدهم و بيقلك : شو حاسس هلق ؟ هون بيسخدموا مثل (دخول الحمام مو متل خروجوا) يعني مظبوط و أنا بأكدلك إنو إحساسك قبل ما تاكل كف غير الإحساس بعد ما تاكلوا , أو إنك حاسس انو فيك شي متغير و انت ما ابتعرف شو هوي بس أي شخص بيحس فيك ؟ هون مصيبة كبيرة لانو هي مرحلة متقدمة من فقدان الإحساس بالنفس و بالطرف الاخر المقابل إلك .أما اذا مو حاسس بشي فهدا شي تاني, يعني انت ما عندك إحساس من أصلوا فهدا شي بعيد عن لي عم نحكي فيه.
 و الإحساس بتسمع عنوا من الجنس اللطيف أكتر من الجنس الخشن (طبعا بعيدا عن البرغل) فأي بنت شاكة بتصرفك بتبلش إنو: أنا حاسيتك متغير , و حاسة إنك مو انت , و حاسة إنو في شي , وحاسة إنو ما عاد بدك ياني , أو حاسة إنو انت عم تعمل هيك لتبعد عني ,,ولو انت مو حاسس بشي من لي عم تحكي , وأحيانا بيكون العكس يعني بتقول حاسة إنو نحنا مو لبعض أو حاسة إنو ما فينا نكمل مع بعض أو أنا حاسة أنك مو إلي , أو حاسة انو أهلي حاسين و لازم تحكي بالموضوع أو كلشي بينتهي , وبكل الاحوال أنت بتحس بشي معين أول ما بتسمع هالحكي و بعدين بيتغير إحساسك , و عنجد هي حالة طبيعية .
 و موضوع الاحساس لازموا حل يعني كتير شائع و مستخدم لدرجه ماضل في إحساس بالكلمة , أو باللقمة و بصراحة لازم كل واحد يحس ع دموا و يمشي ورا إحساسوا لنشوف لوين بدوا يوصلنا لربما اذا امشينا ورا إحساسنا منوصل لنهاية , بعتقد أحسن من نهاية إنو نحنا ماشيين إلى اللانهاية , و هدا مجرد إحساس .