كانت الساعة 3 ظهرا و البولمان متجه إلى العاصمة في تمام الساعة 3.15 و انا كنت عم شوف بطاقة الحجز منشان ما يصير معي أي مشكلة و فجأة اسمعت صوت عم ينادي لك هدا انت ؟؟ ولو و ينك ؟؟؟ لك اهلين !!
اطلعت و اذ هدا صديقي قديم من ايام المدارس , سلمنا ع بعض و اتفقنا انو نحكي اكتر بالاستراحة المخصصة ع طريق السفر , وبالفعل اطلعنا بالبولمان و قلتلوا : أنا رقم مقعدي 25 , ضحك وقلي انا رقم مقعدي 2 ابتعرف انا ما غير بالمقاعد الاولية , (طبعا ما اعرفت ليش بس ما كان في وقت لاسألوا ) و انطلق البولمان ع العاصمة , الشي لي لفت انتباهي انو من موبايل صديقي ما توقف عن الرن و خصوصا مع نغمة دبكة من الاغاني الشعبية المخضرمة جدا !! , و بعد مرور ساعة ونصف توقف البولمان بالاستراحة و بالفعل التقيت انا و صديقي القديم بالاسم الجديد بالطبع , و سالني : شو عم تشتغل هالايام ؟؟
فجاوبت : بنفس المصلحة لي تركتني فيها بس برا البلد و هلق طالع ع العاصمة لانو (و اقتربت منو و احكيت بصوت منخفض ) طالبني فرع الداخلي رقم 2010 ميلادي و ضحكت , بس هوي ما ضحك و اتغيرت نظرتوا , قلي اي و مبسوط بحالك ؟؟ قلتلوا: لك لا شبك؟؟ فقلي خلص ولا يهمك , اصلا انا حاليا بالفرع و هلق بعرفلك شو القصة , و اتجهنا ع البولمان و نحنا و طالعين سألني شو رقم مقعدك؟ فجاوبت انو 25 .
بعد مرور 15 دقيقة , رن موبايل صديقي و طبعا لما بيرن الموبايل كلنا منسمع لانو الصوت عالي جدا , و البركة بالتكنولوجيا , و فجأة توقف كلشي الا دواليب البولمان , و صوت صديقي عم يطرب الجميع و بكلمة قالها غيرت ملامح الوجوه لجميع الركاب : كيف الفرع 2010 ؟؟؟ في عندي صديق بدي اعرف اخبارو؟ هوي معي بالبولمان و رقم مقعدو 25 , وطبعا من بعد هالوصف لي قاعد حدي استاذن و لي الراكب قدامي سلم عليّ ف غير مقعدو و القاعد ورا مقعدي غير مكانو لانو شايف كلوا عم يغير و ارجع ع المقعد الاخير بالبولمان .
صديقي تابع حديثوا و بكلمة جديدة (مطلوب ) عملت توقف بقلوب الركاب مع صوت واحد للجميع (لا ) و ارجع الكل ع المقعد الاخير , و ضليت انا بالمقعد ( وفكرت ارجع معهن ) للمقعد الاخير لانو انا خفت من حالي و خصوصا انو انا اطلعت مطلوب !!! اقترب من حدي معاون السائق و قلي لو سمحت اربط حزام الامان ولا تتطلع لبرا !! و بهاللحظة اسمعت صوت صديقي , عم يقول لا تخاف يمكن يكون تشابه اسماء لانو مو متاكد و بعد 10 دقايق بيوصلني الخبر , وبهالوقت كنت اسمع همس الركاب و الاستفسرار عن شو ممكن كون انا عامل ؟ او مثلا شو مصير لي بيعرفني ؟؟ او لي سلم عليّ ؟؟!!! و رن موبايل صديقي ليقطع الهمس و ضحك صديقي و كلنا اضحكنا معو , و ابتسم و كلنا ابتسمنا , نظر صديقي من المقعد الاول و قال : تشابه اسماء , الشخص المطلوب مو انت , انبسطوا و عطى اشارة لمعاون السائق و اشتغلت الموسيقى الشعبية و اشتغل التلفزيون الموجود بالبولمان مع فيديو كليب من محطة وشاشة غنوة العرب و ارجعوا الركاب للمقاعد و النوم من بعد فترة الارهاق العصبي لي مروا فيها .
بعد فترة 15 دقيقة رن موبايل صديقي و خيّم صمت و تغيرت ملامح وجهه صديقي و قال : يا فلان الفلاني لي بالمقعد رقم 25 لا تتحرك , و تابع حديثوا , تفجير عن طريق الحزام ؟؟؟ او عن طريق الموبايل ؟
و عطى اشارة لمعاون السائق ليشلحوني و ابقيت انا طرزان القرن 21 بس راكب ب بولمان
و بعد دقايق رن موبايل صديقي و اضحك و شهق و ابتسم و قال : لك مليح تفجر البولمان المشبوه و طلع هداك الشخص بهداك البولمان و ارجعت انا البست هدومي و ارجعنا لحالة البهجة بالبولمان . و هيك وصلنا ع العاصمة و طبعا لما توقف البولمان بالكراج الركاب نزلوا خلال ثواني و ابقيت انا و صديقي لي بالمقعد الاول
اقترب مني و قلي و هلق وين رايح ؟؟ قلتلوا يمكن ما فيني قوم من المقعد لاني انحليت و ما فيني امشي !!
اضحك و قلي ( لا ) لازم تكون اقوى من هيك , بس سؤال : مين قلك انو انت اسمك مطلوب بالفرع ؟؟
قلتلوا : انا انا كنت حابب امزح معك لانو صرلي فترة ما شفت فيها بس حضرتك و قلت بعمل فيك ضرب
و هون ضحك صديقي و ضحك وضحك و قال : بدي قلك شغلة
قلتوا دخيلك كلشي بس لا تقلي فرع او شي من هالقصص
قلي لك فرع شو , بس انا كمان كنت عم امزح معك و خصوصا انو انا اصلا ما معي رصيد بالموبايل لحتى احكي مع حدا بس انا كنت معير الموبايل منشان يرن و اتذكر انو لازم اشرب حبة الدوخة ( لاني بدوخ ع الطريق و ممكن طلّع كلشي ببطني ) بس ما توقعت انو تكون ردة هالفعل هيك و ضحك و طلعت انا بمزح احسن منك مووو؟؟؟
و انا صرت ابكي و بعدين صرنا نضحك مع بعض , و خصوصا انو المزح بغير وقتوا مو مزح ولا ضحك
بس بالفعل كان البولمان حافلة ............بالامور
