بسمة أمل

يا ريتك يا ستي ما تركت التنور يا ريتك كبرتي الرغيف

يا ريت هالصّاج كان كبير  وبقد القمر اعملتي رغيف خبز ليشبع كل جوعان …..

يا ريتك ما تركتي الضو بو شريط  او الضو نمرة خمسة ع القليلة كان هالضو شوية امل عطانا , وما انطفا عند أقل نسمة هوا ….يا ريت هالايد السمرا ضلت تزرع بالارض لنحصد محبة و خير …, لو أنو هالصبح ما صار ختيار كنا ضلينا نفيق بكير لنشوف الشمس . تعبنا من العتم يلي عم يلفنا لف و كل يوم بدو يدبحنا بسكين شكل , حيجتنا همّ وغم ّ و قال وقيل اتركونا مبسوطين ما بدنا نعرف شو عمل غيرنا .

وينك يا بنت ؟ اي انت البنت المندورا لاهلا , البنت لي ما بتقول( لا) بوجه بيها , وينك يا حبة الحنطة لتصيري شي مليون سنبلة حب بنفوس انزعت كره و غيره و حسد ….وين  كلمة كيفك أو شو اخبارك , يا ريت هالقمر  يحكي اشقد في ناس نطروا و سهروا معوا وسالوا عن أخباروا…

حيجتنا بكي لانو كل دمعه هي نقطة دم عم تمشي بعروق طفل لسى ما اجى على هالدنيا ..اكسروا القيود بس ما تكسروا التقاليد  و حبل المشنقة معمول من الكذب , و الكذب قد ما كبر حبلوا قصير و الحق بدو يعيش هيك اسمعنا وما في حدا كذب هالقول …